जनकपुरधाम । धनुषा प्रहरीले हतियारसहित एक जनालाई पक्राउ गरेको छ ।

सोमबार राति जनकपुरधाम उप–महानगरपालिका वडा नं. ९ थापा चोकबाट हतियारसहित एक जनालाई पक्राउ गरेको हो ।

पक्राउ पर्नेमा जनकपुर–९ का मनिष अधिकारी रहेका छन् ।

घरको छतमाथि गोली चलेको भन्ने सुचनाको आधारमा जिल्ला प्रहरी कार्यालयबाट खटिएको टोलीले उनलाई पक्राउ गरेको हो ।

घरको खानतलासी गर्दा किचन कोठाको टप माथि लुकाई छिपाई राखेको अवस्थामा गोली लोड गरेको म्याग्जिन सहितको पेस्तोल फेला परेको प्रहरीले जनाएको छ ।

गणेश यादवको छोरा मनिष कुमार अधिकारीले श्रीमतिसंग घरायसी विवादको विषयलाई लिई उनले लुकाई छिपाई राखेको पेस्तोलबाट आफ्नै घरको छतमा गोली चलाएको थियो ।

AUTO PISTAN USA लेखिएको पेस्तोल थान १, गोली १ राउण्ड र म्याग्जिन १ सहित ३७ वर्षीय अधिकारीलाई पक्राउ गरी हातहतियार तथा खरखजाना मुद्दा शिर्षकमा म्याद थप गरी अनुसन्धान अघि बढाएको प्रहरीले जनाएको छ ।