जनकपुरधाम । भारत गौरव पर्यटक रेल शनिबार (आज) जनकपुर आउने भएको छ । धार्मिक पर्यटक बोकेर भारतको विशेष रेल जनकपुर आउन लागेको हो । पर्यटक बोकेर भारतीय रेल शनिबार साँझ जनकपुर आइपुग्ने नेपाल रेल्वे कम्पनीका महाप्रबन्धक निरंजन झाले बताए । रेलमा पाँच सय भारतीय धार्मिक पर्यटक सवार रहेको अनुमान गरिएको छ । भारतको नयाँ दिल्लीबाट विभिन्न धार्मिक स्थलहरुको भ्रमण गर्दै जनकपुरधाम आउन लागेको हो । भारतीय प्रधानमन्त्री नरेन्द्र मोदीको रामायण सर्किटसित जनकपुरधामलाई जोड्ने अवधारणा अनुरुप दोश्रो पटक धार्मिक पर्यटकसहितको रेल आउन लागेको हो । रेल चढेर आउने पर्यटकहरु शनिबार रात्रि विश्राम जनकपुरधाममै गर्ने र आइतबार धनुषाधाम, महोत्तरीको मटिहानीको भ्रमण गरेर बस चढेर भारत फर्किने कार्यक्रम रहेको महाप्रबन्धक झाले बताए ।

भारतीय पर्यटकलाई मधेश प्रदेशको राजधानी जनकपुरधाममा विभिन्न क्षेत्रका अगुवाहरुले स्वागत गर्ने कार्यक्रम छ ।

यसअघि असार ९ गते भारत गौरव पर्यटक रेल चार सय ९९ भारतीय धार्मिक पर्यटक बोकेर जनकपुरधाम आएको थियो ।

रेलका बोगीका बाहिरी भागमा भारतीय स्मारक, नृत्य, परिकार, पोशाक, पर्व, वनस्पति तथा जीवजन्तु, योग, लोककला जस्ता भारतको कला, संस्कृति, परम्परा, सम्पदालगायतका बहुरूप झल्किने गरी चित्र सामग्री पनि राखिएको थियो ।

रामायण सर्किटसँग सम्बन्धित अयोध्या, नन्दिग्राम, सीतामढी, बनारस, प्रयागराज, चित्रकुट, पञ्चवटी ९नासिक०, हम्पी, रामेश्वरम् र भद्राचलम् जस्ता प्रख्यात धार्मिक गन्तव्यका साथै नेपालको जनकपुरधामस्थित धार्मिक क्षेत्रलाई जोड्न २०७९ असारमा आइपुगेको धार्मिक यात्रालाई निरन्तरता दिन आफूले पहल गरेपछि ‘भारत गौरव पर्यटक रेल’ फेरि आउने निश्चित भएको महाप्रबन्धक झाले बताए ।