जनकपुरधाम : मधेश प्रदेशमा महिला विकासका लागि बेटी जिन्दाबाद महाअभियान संचालन हुने भएको छ ।
खेलकूद तथा समाज कल्याण मन्त्री प्रमोद जयसवालले शुक्रबार एक कार्यक्रममा बोल्दै प्रदेशमा बेटी जिन्दावाद महाअभियान संचालनको तयारी भइरहेको जानकारी दिए ।
जनकपुरधाममा शुक्रबार आयोजित बालविवाह, उमेर नपुगी र जबरजस्ती गरिने विवाह न्युनिकरणका लागि स्थानीय प्रणाली सुदृढिकरण परियोजनाको समीक्षा कार्यक्रममा बोल्दै मन्त्री जयसवालले प्रदेशका महिलाको विकास गर्ने उद्येश्यले बेटी जिन्दाबाद महाअभियान संचालन गर्न लागिएको बताए ।
मधेश प्रदेशमा महिला सशक्तिकरण गर्ने उद्येश्यले मुख्यमन्त्री तथा मन्त्रिपरिषद्को कार्यालयले २०७५ सालदेखि बेटी पढाउ बेटी बचाउ कार्यक्रम संचालन गरेको थियो ।
२०७६ सालमा महिला सुरक्षाका उद्येश्यले गृह, संचार तथा कानुन मन्त्रालयले सुरक्षित बेटी अभियान थालेको थियो ।
अव खेलकूद तथा समाज कल्याण मन्त्रालयले बेटी जिन्दाबाद महाअभियान संचालन गर्ने तयारीमा लागेको हो ।

प्रदेश सरकारको यो महाअभियानमा सरकारी, गैरसरकारी संघसंस्थाको सहयोग आवश्यक रहेको मन्त्री जयसवालले बताए ।
सामाजिक रुपान्तरणमा यो महाअभियान उपयोेगी साबित हुन्छ, मन्त्री जयसवालले भने–यसमा सबै जनाले सहयोग गर्नुहोस् ।
सामाजिक बेथितिको अन्त्य गरेर सभ्य र विकसित समाजको परिकल्पना गरेर मधेश प्रदेश सरकारले बालिका संरक्षण सम्बन्धी ऐन ल्याएको मन्त्री जयसवालले थपे ।
सामाजिक विकृति विरुद्धको प्रदेश सरकारको अभियानमा सबै पक्षको सहयोग अपरिहार्य रहेको उनले बताए ।
खेलकूद तथा समाज कल्याण मन्त्रालयका निमित्त सचिव चुडामणि फुयालको अध्यक्षतामा भएको समीक्षा कार्यक्रममा बालविवाह, उमेर नपुगी र जबरजस्ती गरिने विवाह न्यूनिकरणका लागि स्थानीय प्रणाली सुदृढिकरण परियोजना संचालन भइरहेका स्थानीय तहका जनप्रतिनिधिहरुलाई सम्मान गरेको थियो ।
युएसएडको सहयोगमा ब्रेकथ्रु एक्शनले महोत्ती, रौतहट जिल्लाका पालिकाहरुमा सो परियोजना संचालन गरेको हो ।